Əfv hüququ

Nüfuzlu iş adamının qətlində onun oğlu Vikenti Çuxontsev və mühafizəçi Dmitri Belov təqsirləndirilir. Məhkəmə hər iki şəxs barəsində ədalətsiz hökm çıxarır. Əsl sifarişçinin kimliyini bilən prokuror İqor Gerber vəzifə cinayətinə əl ataraq həqiqəti gizlədir. Bu qanunsuz addımın müqabilində o, gəlirli iş, böyük sərmayə və uğurlu karyera əldə edir.

İyirmi il ötəndən sonra İqorun firavan həyatı alt-üst olur. Onun həyat yoldaşı və qızı qətlə yetirilir, oğlu isə qaçırılır. Cinayətkarı tapmağa çalışan Gerber tezliklə anlayır ki, bu qisas keçmişdə yol verdiyi haqsızlığın birbaşa nəticəsidir.

Ukrayna istehsalı olan «Право на помилование» kriminal dram serialı 2009-cu ildə rejissor Oleq Turanski tərəfindən çəkilib. Baş rolları Aleksandr Peskov, Natalya Qudkova, Yelena Ksenofontova və İvan Bezborodov canlandırıblar.