Qətl

«Forbrydelsen» («Qətl») serialında hadisələr gənc bir qızın amansızcasına öldürülməsi ilə başlayır. Nişanlısının ardınca Danimarkadan İsveçə köçməyə hazırlaşan detektiv Sara Lund bütün şəxsi planlarını təxirə salaraq bu cinayəti araşdırmağa məcbur olur. İlk şübhələr dərhal Kopenhagen şəhərinin mer vəzifəsinə namizəd olan Troels Hartmana yönəlir.

Siyasətçinin cinayətlə açıq əlaqəsi görünsə də, Sara tezliklə bu işin təkcə bir nəfərlə bitmədiyini anlayır. Şübhəlilərin siyahısı getdikcə genişlənir. İstintaq irəlilədikcə qətlin arxasında siyasi çəkişmələrlə yanaşı, həm də şəxsi motivlərin dayana biləcəyi üzə çıxır.

Üç mövsümdən ibarət olan ekran əsəri Danimarka, İsveç, Norveç və Almaniyanın ortaq istehsalıdır. 2007-ci ildə işıq üzü görən dramatik trillerin rejissor kürsüsündə Kristoffer Nüholm və Qans Fabian Vullenveber əyləşib. Baş rolları Sofi Qrobel, Morten Suurballe, Lars Mikkelsen və Byarne Henriksen canlandırıblar.