Yoluxma

Moskva şəhərində qəribə bir virusa yoluxma halı qeydə alınır. Xəstəliyin əlamətləri vaxtilə Afrikada çalışmış virusoloq Drobişin rastlaşdığı təhlükəli infeksiyanı xatırladır. Çox keçmədən Moskva ətrafındakı kiçik bir şəhərdə yeni xəstə aşkar edilir. Həkim əvvəlcə şübhə ilə yanaşsa da, həmin bəla ilə üz-üzə qaldığını anlayır və epidemiyanın yayılmasının qarşısını almaq üçün səlahiyyətli qurumlara kömək etməyə razılaşır.

Drobiş infeksiyanın izi ilə qurbanların sayının artdığı həmin qəsəbəyə yollanır. Bu ərəfədə həkimin televiziyada çalışan keçmiş həyat yoldaşı qızları vasitəsilə sirli hadisələrdən xəbər tutur və sensasiya axtarışı ilə çəkiliş qrupunu da götürüb gizlicə ora gedir. Hadisələrin gedişində aydın olur ki, bu virus süni şəkildə yaradılıb və onun yayılmasında bəzi məmurlarla biznes dairələrinin maraqları var.

Rusiyanın istehsalı olan «Yoluxma» («Zarazhenie») adlı detektiv serialı 2020-ci ildə rejissor Rüstəm Urazayev lentə alıb. Əsas rolları Eduard Flyorov, Yelena Laquta, Nina Qoqayeva və Yuri Nikolayenko canlandırıblar.