Pianinoçu

İstedadlı musiqiçi Mariya Belyayeva tanınmış yazıçı olan nişanlısı Oleq Latsisin yeni kitabının uğurunu qeyd etmək üçün onun yanına gəlir. İstirahət mərkəzindəki restoranda keçirilən ziyafətdə Oleq gərgin görünsə də, səbəbini gizlədir. Səhəri gün yaxınlıqdakı sahildə ofisiant Liliyanın meyiti tapılır və tezliklə onun Oleqin məşuqəsi olduğu üzə çıxır. Acı xəyanəti öyrənən Mariya dərhal oradan uzaqlaşır.

Növbəti gün geri qayıdan qadın bu dəfə Oleqin cansız cəsədi ilə qarşılaşır. Yazıçının telefonunda cinayəti etiraf etdiyi mesaj tapılsa da, Mariya bu fakta şübhə ilə yanaşır. Nadir musiqi duyumu sayəsində yalanı saxta not kimi hiss edən qəhrəman sevgilisinin günahsız olduğunu sübut etməyə çalışır.

Rusiyada istehsal olunmuş üç mövsümlük «Pianinoçu» serialı 2021-ci ildə işıq üzü görüb. Ekran işinin rejissorları Andrey Silkin və Sergey Borçukova aiddir. Baş rolları Yevgeniya Loza, İvan Jidkov, Anatoli Rudenko və Yekaterina Ratnikova canlandırıb.