Təmas

Xüsusi xidmət orqanlarının maqnit anomaliyası zonasında həyata keçirdiyi partlayış zamanı təsadüfən üç nəfər hadisə yerində olur: cinayətkar Vladimir Qolenko, fotoqraf Oleq Malinin və uğursuz yazıçı Venedikt Tartakovski. Hadisədən dərhal sonra onların arasında qəribə bağ yaranır. Belə ki, Malinin cinayətkarın düşüncələrini oxuya və dünyanı onun gözləri ilə görə bilir, Tartakovski isə Qolenkonun hərəkətlərini tam idarə etmək və fotoqrafla uzaqdan əlaqə saxlamaq imkanı qazanır.

Əlinə fürsət düşən Tartakovski vaxtilə həyatına mane olan insanlardan intiqam almaq üçün cinayətkardan istifadə etməyə qərar verir. Şəhərdə amansız cinayətlər dalğası başlayır. Gördüyü mənzərələrin reallığını anlayan Malinin kömək üçün polisə üz tutur, lakin hüquq-mühafizə orqanları onu cinayət şəriki hesab edərək psixiatriya xəstəxanasına yerləşdirirlər.

2018-ci ildə təqdim olunan «Təmas» fantastik detektiv serialı Rusiya və Ukrayna istehsalıdır. Layihənin rejissoru Mixail Barkandır. Baş rollarda Matvey Zubaleviç, Pavel Barşak, Aleksandr Semçev və Yekaterina Malikova çəkiliblər.