Gözəllik qurban tələb edir

Qırx yaşına çatan Lera yaşlanma əlamətləri və qırışlarla mübarizə aparmaq barədə düşünməyə başlayır. Həyat yoldaşı İqor onu hər halı ilə sevdiyini desə də, rəfiqəsi İra kişilərin sözlərinə inanmamağı və gələcəkdə peşman olmamaq üçün tədbir görməyi tapşırır. Nəticədə qadın cavanlaşmaq qərarına gəlir və bahalı plastik cərrahiyyə klinikasına müraciət edir.

Xəstəxana divarları arasında onu gözlənilməz hadisə qarşılayır. Gecə palatadan dəhlizə çıxan Lera orada tanınmış bir aktrisanı görür. Yalnız bir neçə dəqiqədən sonra xatırlayır ki, gündüz xəbərlərində həmin sənətçinin faciəvi şəkildə həyatını itirdiyi elan edilmişdi.

Ukrayna istehsalı olan «Красота требует жертв» (və ya «Кохання. Побічний ефект») detektiv melodram serialı 2018-ci ildə ekranlara çıxıb. Ekran əsərinin rejissoru Yuri Popoviçdir. Əsas rolları Svetlana Timofeyeva-Letunovskaya, Yuliya Takşina, Pavel Delonq və Mixail Dorojkin canlandırıblar.