Vera üçün tapmaca

Vera yataqxanada yaşayır və başqalarının itlərini gəzdirməklə pul qazanır. Fərasətli rəfiqəsi Olqanın dəstəyi ilə o, nəhayət birotaqlı mənzilə sahib olur. Lakin sevinci uzun çəkmir: köçdüyü gün dələduzların qurbanına çevrilən gənc qız evini onlara vermək məcburiyyətində qalır. Ev qəsbkarları onu aldadılmış daha beş təqaüdçünün sığındığı «Çudilnik» adlı qəribə ikimərtəbəli binaya göndərirlər.

Adı çıxmış bu məkanda ilk gecədən etibarən qorxulu kabuslar peyda olur: pəncərədən baltalı kişi və qucağında ölü uşaq olan qadın boylanır. Bənzər qarabasmalar digər qocaları da narahat edir. Keçmiş DTK polkovnik-leytenantı Qluşko düşünür ki, hamısı gizli televiziya realiti-şousunun iştirakçılarıdır. Binada həqiqətən də gizli kameralar quraşdırılıb, lakin baş verənlər adi televiziyaya qətiyyən bənzəmir.

2011-ci il istehsalı olan «Vera üçün tapmaca» detektiv triller serialının rejissoru Natalya Rodionovadır. Layihədə əsas obrazları Karina Andolenko, Valeri Barinov, Yuri Nifontov və Vasili Mişşenko canlandırıblar.