Qaynar perimetr

Hərbi xidməti yenicə başa vuran desantçılar Andrey və İqor dincəlmək üçün dənizkənarı kiçik bir şəhərə yollanırlar. Onlar İqorun doğma xalasının evində məskunlaşırlar. Qadın gənclərə sahildə qızların qaçırıldığını və polisin cinayətkarları tapa bilmədiyini bildirir. Tezliklə dostların özləri şübhəli şəxs qismində saxlanılır, çünki onların əvvəlki gün tanış olduqları qızlar yoxa çıxır.

İstintaqı mayor Nikolski aparır. O, gənclərin bu cinayətlərlə əlaqəsi olmadığını anlayır və axtarılan şəxslərin iki hündürboylu, idmançı oğlan olduğunu deyir. Növbəti gün çimərlikdə İqor həmin təsvirə uyğun naməlum şəxsləri görür. Andrey dənizdə çimərkən İqor hücuma məruz qalır və koma vəziyyətində xəstəxanaya çatdırılır. Ekspertlər onun bədəninə güclü təsir edən preparat vurulduğunu aşkar edir və Andrey mayorla birlikdə axtarışa qoşulmaq qərarına gəlir.

«Qaynar perimetr» serialı 2014-cü ildə Rusiyada çəkilib. Kriminal detektiv janrında olan bu layihənin rejissoru İqor Drakadır. Əsas rolları Sergey Qorobçenko, Nikita Volkov, Yuri Nikolayenko və Oksana Skakun canlandırıblar.