Uçurumun kənarında

Marina Krapivina uzun illər şəxsi mənzil almaq üçün pul toplayır və nəhayət, kredit götürərək arzuladığı evə köçür. Lakin daşınmaz əmlak agentinin gizlətdiyi fakt tezliklə üzə çıxır: mənzildə cəza çəkən cinayətkar Myakişev qeydiyyatdadır. Həbsdən çıxan peşəkar quldur birbaşa mənzilə gəlir, mətbəxdə yerləşir və oradan getməkdən qəti şəkildə imtina edir.

Problemlər bununla bitmir və iş yerində rəhbəri Marinaya qarşı xoşagəlməz tələblər irəli sürməyə başlayır. Rədd cavabı alan qadın dərhal işdən qovulur. Çarəsiz vəziyyətdə qalan Marina yeni qonşusuna keçmiş iş yerindəki gizli pullar və qanunsuz dövriyyə barədə danışır. Fürsətdən istifadə edən cinayətkar şirkəti qarət edərək aradan çıxır və oğurlanmış vəsaiti qaytarmaq məcburiyyəti Marinanın üzərinə düşür.

2018-ci il istehsalı olan Rusiyanın «Na obrıve» («Uçurumun kənarında») serialı melodram və detektiv janrlarını birləşdirir. Layihənin quruluşçu rejissoru Oleq Ştromdur. Əsas rolları Svetlana Kolpakova, Andrey Çadov, Leonid Qromov və Darya Kalmıkova canlandırıblar.