Xoşbəxtlik axtarışında

Əyalət şəhərində yaşayan gənc satıcı Katya balaca qızı Daşa və anası ilə birgə həyat sürür. Yoldaşını narkotik səbəbindən itirən qadın işə düzəldiyi ərzaq dükanında qorxunc bir sirrin üstünü açır. Məlum olur ki, mağazanın sahibi Ruslan gizlicə heroin satır və onun yanına bahalı maşınlarda cinayətkarlar gəlir.

Müdirinin narkodiler Fil Filçikovla söhbətini eşidən Katya dərhal milisə xəbər verir. Şikayəti qəbul edən serjant Stepan qıza aşiq olsa da, şöbə rəhbərliyi yerli cinayətkar qruplaşma ilə əlbir çıxır. Hadisələrin gözlənilməz gedişi nəticəsində Katya şahid yerinə şübhəli şəxsə çevrilir və paytaxt orqanlarından kömək tapmaq ümidi ilə Moskvaya qaçmalı olur. Təhlükələrlə dolu bu səfərdə gənc qadın müxtəlif taleli moskvalılarla qarşılaşır və bəziləri ona dəstək durur.

Detektiv və melodrama janrında olan «Xoşbəxtlik axtarışında» serialı 2009-cu ildə Rusiyada çəkilib. Layihənin quruluşçu rejissoru Aleksandr Suxarevdir. Baş rolları Yekaterina Vinoqradova, Nikita Zverev, Tatyana Şankina və İvan Aqapov canlandırıblar.