Spiral

Özünü azad sənətkar adlandıran Arturo Kopenhagendə topladığı tərəfdarları ilə birlikdə Avropa boyu səs-küylü ictimai aksiyalar təşkil edir. Qrupun hədəfində siyasi sistem və elita dayanır. Bu fəaliyyət Avropolun diqqətini çəkir və hüquq-mühafizə orqanları rəhbəri həbs etməyə hazırlaşır, lakin Arturonun daha böyük bir planı var.

O, qitənin müxtəlif muzeylərindən eyni vaxtda altı dünya şöhrətli rəsm əsərini oğurlamağı hədəfləyir. Məqsəd incəsənətə investisiya adı altında vergidən yayınan və çirkli pulları yuyan nəhəng korporasiyaları ifşa etməkdir. Oğurlanmış rəsmlərin axtarışına internet üzərindən sadə insanlar da cəlb olunur, lakin oyun gözlənilmədən təhlükəli məcraya yönəlir və iştirakçıların həyatı təhdid altına düşür.

2012-ci ildə çəkilmiş «Spiral» serialı Belçika, Danimarka, Almaniya, Niderland, Norveç, Finlandiya və İsveçin ortaq istehsalıdır. Detektiv trillerin rejissor kürsüsündə Hans Herbots əyləşib, əsas rolları Pav Henrikson, Elmer Bək, Teun Lüyks və Tomas Rikkivart ifa ediblər.