Ağ Milad

Tətil başlayan kimi qapalı elit məktəb-internatın demək olar ki, bütün şagirdləri evlərinə yollanır. Binada cəmi yeddi gənc qalır və onların hər biri naməlum şəxsdən qəribə məktub alır. Məktub müəllifi qalanları ağır günahlarda ittiham edir və onları lənətin gözlədiyini bildirir.

Çox keçmədən hadisələrə digər şəxslər də qarışır. İttiham olunan yeniyetmələrə bir müəllim, qovulmaqdan qorxaraq gizlincə məktəbdə qalan başqa bir şagird və təsadüfən bura gəlib çıxmış psixiatr qoşulur. Onlar kimsəsiz qalmış koridorlarda cərəyan edən müəmmalı durumla üz-üzə qalırlar.

Cənubi Koreya istehsalı olan «Ağ Milad» («Hwaiteu keuriseumaseu») dram və detektiv serialı 2011-ci ildə ekranlara çıxıb. Layihənin rejissoru Kim Yon-sudur. Əsas obrazları Kim San-qyon, Pek Son-hyon, İsom və Li Su-hyok canlandırıb.