Cold Haven

Məişət zorakılığından və keçmişin qaranlıq sirlərindən qurtulmaq istəyən portuqaliyalı Mariya yenidən başlamağa qərar verir. O, yeniyetmə qızı Bela ilə birlikdə İslandiyanın təcrid olunmuş Vestmannaeyyar arxipelaqına köçür. Lakin altı aydan sonra qadının cansız bədəni qarın ortasında tapılır və bu hadisə ada sakinlərini dərindən sarsıdır.

Cinayətin istintaqı bu torpaqlarda doğulub böyümüş detektiv Soffiyaya həvalə edilir. O, təhqiqat aparmaq üçün doğma yerlərinə qayıtmalı olur. İşi araşdıran polis əməkdaşı təkcə qətlin səbəblərini və yerli əhalinin gizli tərəflərini deyil, həm də öz keçmişindəki xatirələri üzə çıxarmaq məcburiyyətində qalır.

2025-ci ildə ekranlara çıxan «Cold Haven» dramatik detektiv serialı Portuqaliya və İslandiya kinematoqrafçılarının birgə işidir. Ekran işinin rejissoru Arnor Palmi Arnarsondur, əsas obrazları isə Katarina Rebelo, Kristín Þóra Haraldsdóttir, Anna Svava Knútsdóttir və Viktor Benóný Benediktsson canlandırıblar.