Battlestar Galactica: Mini-seriyalar

İnsanlar tərəfindən on iki koloniyada xidmət etmək üçün yaradılan robotlar — saylonlar keçmiş sahiblərinə qarşı üsyan qaldırmışdılar. Qanlı toqquşmalardan sonra atəşkəs elan olundu və maşınlar özlərinə yeni məskən tapmaq üçün uzaqlaşdılar. Dörd onillik ərzində onlardan heç bir xəbər çıxmadı, lakin bir gün saylonlar gözlənilmədən geri qayıtdılar.

Koloniyaların müdafiə sistemlərini sıradan çıxaran düşmən planetlərə nüvə zərbələri endirdi və hərbi donanmanın böyük hissəsini darmadağın etdi. Təsadüfən xilas olan yeganə döyüş gəmisi isə istismardan çıxarılmaq üzrə olan köhnə «Qalaktika» oldu. Komandir Uilyam Adama sağ qalmış mülki gəmiləri ətrafına toplayaraq insan nəslini qorumaq üçün yola çıxır.

ABŞ istehsalı olan «Battlestar Galactica» adlı elmi-fantastik serial 2003-cü ildə rejissor Maykl Raymer tərəfindən ekranlaşdırılıb. Əsas rolları Edvard Ceyms Olmos, Meri Makdonnell, Keti Sakhoff və Ceymi Bamber canlandırıblar.