Komissar Malteze

Hadisələr ötən əsrin 1970-ci illərində, heroin istehsalının Marseldən Siciliyaya köçdüyü dövrdə cərəyan edir. Narkotiklərlə mübarizə idarəsinin yüksək rütbəli əməkdaşı Dario Malteze doğma şəhəri Trapaniyə yollanır. O, atasının müəmmalı ölümünü araşdırmağa çalışarkən yerli mafiyanın düşündüyündən qat-qat yaxında olduğunu görür.

İstintaq dərinləşdikcə komissar qarşısında korrupsiya və qanunsuzluqla dolu bir şəbəkə açılır. Məlum olur ki, muzdlu qatillər nüfuzlu siyasətçilər və tanınmış şəxslərlə sıx əlaqədə fəaliyyət göstərirlər. Beləliklə, Maltezeni aradan qaldırmaq tapşırığı alan cinayətkarlar onun arxasınca düşür və qəhrəman həyatını riskə ataraq onlara qarşı durmağa məcbur qalır.

İtaliya istehsalı olan «Maltese - Il romanzo del commissario» serialı 2017-ci ildə ekranlara çıxıb. Kriminal dramın rejissoru Canluka Mariya Tavarellidir. Əsas obrazı Kim Rossi Styuart canlandırıb, digər rollarda isə Paolo Rikka, Antonio Milo və Françesko Şanna çıxış edirlər.