El Turco

Hadisələr XVII əsrdə, Osmanlı ordusunun Vyana döyüşündəki məğlubiyyətindən sonra cərəyan edir. Əsir düşən yeniçəri Həsən Balaban edam olunmağa məhkum edilsə də, qaçmağın yolunu tapır. Ağır yaralanan döyüşçü İtaliya Alplarında yerləşən kiçik Moena kəndinə gəlib çıxır. Qloriya adlı yerli qadın ona sığınacaq verir, yarasını sağaldır və zamanla onların arasında romantik bağ yaranır.

Eyni zamanda kənd əhalisi yerli feodalın zülmündən əziyyət çəkir. Ərazini cadugərlərdən təmizləmək və qaçqın türkü tapmaq üçün kəndə silahlı dəstə göndərilir. Balaban Qloriyanı tonqalda yandırılmaqdan qurtarır və kəndin müdafiəçisinə çevrilir. Həsənin vaxtilə qardaş bildiyi, lakin sonradan düşməninə çevrilmiş qəddar cəngavər Marko gəldikdə vəziyyət daha da kəskinləşir.

«El Turco» tarixi dram və macəra serialı Türkiyə ilə Macarıstanın birgə istehsalıdır. 2025-ci ildə ekranlara çıxan ekran əsərinin rejissoru Uluç Bayraktardır. Əsas rolları Can Yaman, Qreta Ferro, Uill Kemp və Maqnus Samuelson canlandırıblar.