Kobra

Keçmiş hərbi dəniz xüsusi təyinatlısı Robert Cekson mülki insanların olduğu binadakı düşmən qərargahını partlatmaq əmrini yerinə yetirməyərək xidmətdən qaçır. O, adını və simasını dəyişərək Alyaskanın ucqar kəndində müəllim kimi gizlənir. Lakin keçmişi onu tapır: güllələnən Robert qarın üstündə ölümcül vəziyyətdə tərk edilir. Üç həftə sonra o, Daniella LaPoynt adlı qadının yardımı ilə xəstəxanada yeni üzlə ayılır.

Daniella ona qanundan ümidini üzmüş cinayət qurbanlarına gizli şəkildə kömək edən «Kobra» təşkilatında iş təklif edir. Robert əvvəlcə razılaşmasa da, təşkilatın rəhbəri Dallas Kessel ona beş il əvvəl atasını qətlə yetirən qatili tapmaq imkanı verir. Beləliklə, qəhrəman özünün klassik AC Cobra avtomobilində Bey şəhərində ədaləti bərpa etməyə başlayır.

ABŞ istehsalı olan macəra və döyüş janrlı «Kobra» serialı 1993-cü ildə yayımlanıb. Layihənin rejissor kürsüsündə Bred Tyorner və Lindon Çabbak əyləşib. Əsas rolları Maykl Dudikoff, Ellison Hossak, Ceyms Tolkan və Kiqen Makintoş ifa ediblər.