Kontinental

Hadisələr 1970-ci illərin Nyu-Yorkunda cərəyan edir. Muzdlu qatillərin sığındığı «Kontinental» otelinin idarəçisi Kormak O’Konnorun xüsusi sikkə presi oğurlanır. Bu əşya təkcə otelin fəaliyyəti üçün deyil, bütövlükdə cinayət sindikatı üçün mühüm əhəmiyyət daşıyır. Yuxarı dairələr itkini tapmaq üçün Kormaka cəmi üç gün möhlət verir, əks halda onu ölüm cəzası gözləyir. Oğurluğu isə uşaqlıqdan onun yanında olan və vaxtilə onun ucbatından həbsxanaya düşən Frenki Skott törədib.

Frenkinin kiçik qardaşı Uinston uzun illərdir onunla əlaqə saxlamır və Londonda öz biznesini idarə edir. Kormakın adamları Uinstonu zorla Nyu-Yorka gətirərək qardaşının izinə düşməyə məcbur etmək istəyir. Qanqsterlərlə əməkdaşlıqdan imtina edən Uinston Frenkini özü tapmaq və onu çətin vəziyyətdən qurtarmaq qərarına gəlir.

ABŞ istehsalı olan bu döyüş və kriminal serialı 2023-cü ildə işıq üzü görüb. Layihənin rejissor kürsüsündə Albert Hyuz və Şarlotta Brandstrom əyləşib. Əsas rolları Mel Gibson, Kolin Vudell, Mişel Prada və Ben Robson canlandırır.