Axtarış elan edilib

Şəhərdən kənarda məhbus daşıyan xüsusi maşınla üç silahlı şəxsin olduğu minik avtomobili toqquşur. Hadisə yerinə gələn əməliyyatçılar müəyyən edirlər ki, qəzada hamı həlak olub, yalnız keçmiş iş adamı Vadim Roqov sağ qalıb. Həyat yoldaşını qətlə yetirməkdə şübhəli bilinərək təcridxanaya aparılan bu şəxs isə ortalıqdan yoxa çıxıb.

Qaçağın izinə düşmək təcrübəli FTX müstəntiqi Denis Yevstiqneyevə və onun komandasına həvalə olunur. Narkotiklərlə mübarizə şöbəsinin əməkdaşı Pyotr da onlara qoşularaq mühüm məlumat verir: Roqovun jurnalist xanımı ölümündən əvvəl böyük narkotrafik barədə faktlar toplayıb və qəza əslində sui-qəsd cəhdi ola bilər. Kriminalist Albina isə sürücünün əvvəlcədən güllələndiyini, yəni qaçışın kənardan təşkil edildiyini üzə çıxarır. Eyni zamanda gizli sifarişçi sağ qalan Roqovu aradan qaldırmaq üçün muzdlu qatilləri işə salır.

2010-cu ildə çəkilmiş «Axtarış elan edilib» rus detektiv serialının rejissoru Ramil Sabitovdur. Ekran əsərində əsas rolları Nikita Zverev, Oleq Morozov, Olqa Filippova və Maksim Şyoqolev canlandırıb.