La casa de papel

Professor ləqəbli müəmmalı təşkilatçı İspaniya Kral Zərbxanasını ələ keçirmək üçün peşəkar cinayətkarlardan ibarət xüsusi dəstə toplayır. Onların əsas niyyəti sadəcə qapalı binaya daxil olmaq deyil, içəridə girovlarla qalaraq iki milyard dörd yüz milyon avro həcmində pul çap etməkdir.

İştirakçılar Salvador Dali maskaları taxaraq öz şəxsiyyətlərini gizlədir və əvvəlcədən hazırlanmış plana dəqiq riayət etməyə çalışırlar. Binada qalan girovları nəzarətdə saxlayan dəstə eyni zamanda xaricdən basqın təşkil etməyə cəhd göstərən polis qüvvələri ilə qarşı-qarşıya gəlir.

İspaniya istehsalı olan «La casa de papel» serialı 2017-ci ildə işıq üzü görüb və ümumilikdə 5 mövsümdən ibarətdir. Ekran işinin rejissorları Xesus Kolmenar və Aleks Rodriqodur, baş rolları isə Ursula Korbero, Alvaro Morte, İtsiar İtunyo və Pedro Alonso canlandırıblar.