Kvant sıçrayışı

Hadisələr 1995-ci ildə Nyu-Meksiko səhrasındakı gizli elmi bazada cərəyan edir. Alim Sem Bekket insanın öz ömrü çərçivəsində zamanda səyahət edə biləcəyi nəzəriyyəsini irəli sürərək xüsusi layihəyə rəhbərlik edir. Maliyyələşməni itirməmək üçün o, kvant sürətləndiricisinə daxil olur və qəfil yoxa çıxır.

Keçmişdə gözlərini açan Sem başqa insanların cildinə düşdüyünü anlayır. Onun qarşısında duran əsas məqsəd keçmişdə baş vermiş səhvləri düzəltmək və insanlara kömək etməkdir. Bu çətin yolda ona yalnız layihə üzrə tərəfdaşı admiral Albert Kalaviçinin holoqramı yardım edir; onu isə Semin özündən başqa sadəcə uşaqlar, heyvanlar və ruhi xəstələr görə bilir.

ABŞ istehsalı olan «Kvant sıçrayışı» elmi-fantastik serialı 1989-cu ildə yayımlanmağa başlayıb və ümumilikdə 5 mövsümdən ibarətdir. Ekran işinin rejissorları Ceyms Uitmor kiçik və Co Napolitanodur, baş rolları isə Skott Bakula ilə Din Stokvell canlandırıb.