Ulduz Yolu: Voyacer

2371-ci ildə yenicə istifadəyə verilmiş «Voyacer» ulduz gəmisi ilk tapşırığını yerinə yetirməyə yollanır. Heyətə Kardaşiyanlara qarşı mübarizə aparan və terrorçu sayılan «Maki» təşkilatının gəmisini tapmaq həvalə olunur. Əməliyyat zamanı hər iki kosmik gəmi Qoruyucu adlı yadplanetli tərəfindən yaradılmış məkan anomaliyasına düşür.

Bu hadisə nəticəsində gəmilər Yerdən yetmiş min işıq ili uzaqlıqda yerləşən Delta kvadrantına atılır. Doğma planetə qayıtmaq onilliklər tələb etdiyi üçün kapitan Ceynvey keçmiş rəqiblərlə qüvvələri birləşdirməyə qərar verir. O, heyəti nəyin bahasına olursa-olsun evə qaytaracağına söz verir.

ABŞ istehsalı olan «Star Trek: Voyager» elmi-fantastik serialı 1995-ci ildə yayımlanmağa başlayıb və ümumilikdə yeddi mövsümdən ibarətdir. Ekran əsərinin rejissorları Devid Livinqston və Uinrix Kolbedir. Əsas rolları Keyt Malqryu, Robert Beltran, Roksann Douson və Robert Dankan MakNil canlandırıb.