Kriminal həkim

Cərrah Smirnov bütün vaxtını xəstəxanada keçirir və şəxsi həyatına demək olar ki, diqqət yetirmir. Həyat yoldaşı ondan ayrılıb, atası ilə az ünsiyyət quran oğlu isə ondan uzaqlaşıb. Həkimin yeganə dayağı birlikdə çalışdığı xəstəxananın baş həkim müavini və anestezioloq olan nişanlısı Marinadır. Lakin xilas etdiyi xəstələrdən birinin ertəsi gün müəmmalı şəkildə ölməsi Smirnovun həyatını alt-üst edir.

Ölümün səbəbini araşdırmağa çalışan həkim qətl ittihamı ilə istintaq təcridxanasına düşür, ardınca isə limanın qanunsuz ələ keçirilməsinə qarşı vuruşan bir cinayətkar dəstənin içinə cəlb olunur. Smirnov burada dəyərlərini yenidən nəzərdən keçirir və insan həyatının bu mühitdə heç bir qiymətinin olmadığını görür. Üstəlik, sağ çıxmağın mümkünsüz göründüyü bu dəstədə həkimin öz oğlu da peyda olur və Smirnov üçün əsas məqsəd sağ qalmaq mübarizəsinə çevrilir.

Rusiyada istehsal olunmuş «Kriminal həkim» serialı 2021-ci ildə işıq üzü görüb. Ekran əsərinin rejissoru Aleksey Karelin, baş rolların ifaçıları isə Kirill Safonov, Anna Snatkina, İqor Jijikin və Mixail Qorevoydur.