Qurd ovu

Meşədə brakonyerlərə qarşı keçirilən əməliyyat polis əməkdaşı Vey Tszyan üçün ağır nəticələnir: o, yaralanır, həmkarı isə həyatını itirir. Hadisədən beş il sonra Vey Tszyan polis sıralarını tərk edərək qoruqda meşəbəyi kimi fəaliyyətə başlayır. Gənc keşikçi Tsin Çuan qəfil yoxa çıxanda təcrübəli meşəbəyini onun axtarışına cəlb edirlər.

Vey Tszyan itkin düşən gənci vaxtında tapıb xilas etməyi bacarır. Elə bu axtarış zamanı onlar meşə zolağında təhlükəli brakonyer dəstəsinin izinə düşürlər. Təcrübəli meşəbəyi və gənc təbiət qoruyucusu qanunsuz ovçuları aşkar edib dayandırmaq üçün qüvvələrini birləşdirirlər.

«Qurd ovu» (Lie Lang Zhe) serialı 2021-ci ildə Çində ekranlara çıxıb. Triller və döyüş janrında çəkilən layihənin rejissorları Tsao Dun və Qao Syandır, baş rolları isə Erik Tsin, İn Fan, Huan Szısin və Şen Tszyani canlandırır.