Direniş Karatay

Uğurlu hökmdar Əlaəddin Keyqubadın ziyafət zamanı zəhərlənərək öldürülməsindən sonra taxta oğlu Qiyasəddin çıxır. Rəqibləri yeni sultanı zəif lider hesab edir və dövləti asanlıqla dağıda biləcəklərini düşünürlər. Sərhədlərə edilən aramsız hücumlar ölkə iqtisadiyyatını çökdürür və saray hərbi vəziyyət elan etməyə məcbur olur.

Monqolların şəhərləri, kitabxanaları və karvanları yandırıb kül etməsi türk və islam mədəniyyətini böyük təhlükə ilə üz-üzə qoyur. Belə bir vaxtda Əmir Cəlaləddin Karatay səlcuqları mübarizəyə səsləyir. O, düşmənə müqavimət göstərmək üçün yaşından və cinsindən asılı olmayaraq bütün Anadolu xalqını bir araya toplayır.

2018-ci ildə çəkilən «Direniş Karatay» tarixi dram serialının rejissoru Səlahəddin Sancaqlıdır. Türkiyə istehsalı olan bu layihədə əsas rolları Mehmet Aslantuğ, Fikrət Kuşkan, Yurdaer Okur və Alperen Duymaz canlandırıb.