Kimi wa petto

Uğurlu jurnalist Sumire İvaya uzun müddət tanınmış qəzetdə beynəlxalq xəbərlər şöbəsində çalışırdı. Rəhbərliyin qəfil qərarı ilə daha az nüfuzlu həyat tərzi bölməsinə keçirilməsi onun əhvalını tamamilə korlayır. Ağır iş günündən sonra kor-peşman mənzilinə qayıdan gənc qadın qapısının ağzında içində taqətsiz bir oğlan olan qutu tapır.

Sumire tanımadığı bu gənci evə gətirərək ona qulluq edir və sağalmasına kömək göstərir. Özünə gələn oğlan isə ev sahibəsinə qəribə bir təklif irəli sürərək onun yanında ev heyvanı kimi qalmaq istədiyini bildirir. Beləliklə, onların birgə həyatı tamamilə fərqli bir məcraya yönəlir.

2003-cü ildə yayımlanan Yaponiya istehsalı «Kimi wa petto» serialı dram, komediya və romantika janrlarını özündə birləşdirir. Ekran əsərinin quruluşçu rejissorları Arata Kato və Fuminori Kanekodur. Əsas obrazları Koyuki, Jun Matsumoto, Eita Nagayama və Satomi Ishihara canlandırıblar.