Kişi axtarılır

"Angelica Style" adlı nüfuzlu gözəllik salonu müxtəlif xanımları bir araya gətirir. Bu məkana üz tutan işçilərin və müştərilərin oxşar dərdi var: onların heç biri arzuladığı kişini tapa bilməyib. Salon hər gün sevgiyə, münasibətlərə və həyata fərqli baxışları əks etdirən səmimi söhbətlərin məkanına çevrilir.

Məkanın sahibi Anxelika ətrafındakı hər kəsə yardım əlini uzadır, onların dərdinə şərik olur. Hər kəsin gözündə onun mükəmməl ailəsi və xoşbəxt nikahı var. Lakin Anxelika ərinin ona xəyanət etdiyindən bixəbərdir; üstəlik, kişinin sevgilisi həmin bu salona gələn və bu ailəni dağıtmaq üçün hər addıma hazır olan bir qadındır.

"Se busca un hombre" Meksika istehsalı olan melodram və dram serialıdır və ilk dəfə 2007-ci ildə nümayiş olunub. Layihənin rejissoru Emmanuel Duprezdir. Əsas rolları Andrea Noli, Luis Miqel Lombana, Rossana Naxera və Anett Mişel paylaşıblar.