Anxela

Gənc müəllimə bütün vaxtını astma xəstəliyindən əziyyət çəkən və bundan istifadə edərək qızını idarə edən şıltaq anası Deliaya həsr edir. Onların münasibətləri qızın həyatına Xulian Arispe daxil olduqdan sonra pisləşir. Çox keçmədən gənc qadın sevgilisinin ona ən yaxın rəfiqəsi Ximena ilə xəyanət etdiyini öyrənir. Həmin gün anası vəfat edir, lakin ölüm ayağında vaxtilə ailəni dağıdan qadının adının Emiliya Santilyana olduğunu bildirir və qızından intiqam almaq vədi alır.

«Anxela» serialının qəhrəmanı həmin qadını tapmaq məqsədilə San-Migel şəhərciyinə yollanır, lakin orada Emiliyanın əslində anasının qurbanı olduğunu başa düşür. Bu şəhərdə o, həm atasını və bacısını tapır, həm də Mariano Bautista ilə yeni sevgiyə addım atır. Lakin bir müddət sonra peşman olmuş Xulian və gözünü Marianoya dikən Ximena San-Migelə gələrək onların dincliyini pozurlar.

Meksika istehsalı olan dram janrlı bu melodram serialı 1998-ci ildə ekranlara çıxıb. Layihənin rejissoru Roberto Qomesdir. Ekran əsərində baş rolları Anxelika Rivera, Xuan Soler, Jaklin Andere və İqnasio Lopes Tarso canlandırıblar.