Viviana

Viviana adlı gənc və sadəlövh qadın həyat yoldaşı Xorxe Armandonun yalanları ilə üz-üzə qalır. Ərinin əsas məqsədi isə var-dövlət naminə restoran sahibinin qızı Qloriya ilə evlənməkdir. Cütlük təkəbbürlü Beatris de los Reyesin malikanəsində yaşayır. Evdə xidmətçi Matilde və qırx beş yaşlı Xesus adlı digər bir kirayəçi də qalır. Evin sahibəsi Viviananı ilk dəfə görəndə heyrətlənir, çünki qız Beatrisin divardan asılmış rəsmi ilə danışdığı sevimli mərhum nənəsinə həddindən artıq bənzəyir.

Gözəlliyi ilə həm rəğbət, həm də paxıllıq qazanan baş qəhrəmana dostu Xulio və Qloriyanın atası Anselmo vurulur. Tezliklə mülkdə ağır cinayət baş verir: qətl hadisəsi törədilir və bütün şübhələr Viviananın üzərinə yönəlir. Qarşılaşdığı haqsızlıqlara və maneələrə baxmayaraq, qız ən böyük arzusundan əl çəkmək istəmir və həkim olmaq üçün mübarizəsini davam etdirir.

1978-ci ildə çəkilmiş Meksika istehsalı olan «Viviana» serialının rejissoru Dimitrio Sarrasdır. Melodram janrlı televiziya layihəsində baş rolları Lusiya Mendes, Ektor Bonilya, Xuan Ferrara və Marikrus Olivye canlandırıb.