Berkli meydanı

Hadisələr iyirminci əsrin əvvəllərində Londonda cərəyan edir. Fərqli mühitlərdən çıxmış Metti, Hanna və Lidiya adlı üç gənc qadın paytaxtın ən zəngin məhəllələrindən sayılan Berkli meydanındakı imkanlı ailələrin malikanələrinə dayə kimi işə düzəlirlər. Yoxsul təbəqədən olan xanımlar üçün belə aristokrat evlərdə xidmət etmək böyük şans sayılır.

Yeni mühit onların hər birinə fərqli sınaqlar hazırlayır. Cəmiyyətdə mövqeyini yüksəltmək istəyən Metti, keçmişdəki gizli eşq macərasından qaçaraq şəhərə sığınan Hanna və müasir baxışlı ailəyə düşən sadəlövh Lidiya gündəlik qayğılarla üzləşirlər. Həyatın enişli-yoxuşlu anlarında və şəxsi münasibətlərdə qızların bir-birinə bəslədiyi möhkəm dostluq ən başlıca dayaq olur.

Böyük Britaniya istehsalı olan «Berkli meydanı» adlı tarixi dram serialı 1998-ci ildə ekranlara çıxıb. Layihənin rejissor kürsüsünü Martin Hatçinqs və Riçard Holthouz bölüşür, baş rolları isə Viktoriya Smörfit, Kler Uilki və Tabita Vadi canlandırır.