Azusena

Karakasın yoxsul məhəlləsində yaşayan Azusena adlı gənc qız varlı ailədən olan Rodolfo İtriaqoya aşiq olur. Lakin sevgililərin evlilik xəyalları ailələrin sosial fərqinə görə maneələrlə qarşılaşır. Rodolfonun anası donya Trinidad və keçmiş nişanlısı Brenda Mirabal bu sevgini bitirmək üçün əllərindən gələni edirlər, çünki İtriaqo ailəsinin Miraballara böyük borcu var və oğlanın atası pullarını başqa bir qadına xərcləyərək ailəni çətin vəziyyətə salıb.

Borclardan qurtulmaq üçün ata Rodolfonu Brenda ilə evlənməyə məcbur edir və gənc oğlan ailəsinin təkidi qarşısında zəiflik göstərir. Sevdiyi insanın bu qərarından sarsılan Azusena Rodolfodan hamilə olduğunu gizlədərək çarəsizlikdən keçmiş sevgilisi olan polis xəfiyyəsi ilə ailə qurmağa razılaşır. Lakin bir-birindən ayrı düşən gənclər yenə də görüşməyə çalışır və hissləri qarşılaşdıqları bütün sınaqlara üstün gəlir.

«Azusena» adlı Venesuela istehsalı olan melodram serialı 1984-cü ildə rejissor Tito Roxas tərəfindən ekranlaşdırılıb. Ekran əsərində baş rolları Qresiya Kolmenares, Xavyer Vidal, Yanis Çimaras və Romeliya Aquero canlandırıblar.