Ku'damm 59

Əlli doqquzuncu ilin astanasında Berlində yaşayan Şöllak bacıları çətin sınaqlarla üzləşirlər. Nikahdankənar hamilə qalan Monika anası Katerinadan yardım istəsə də, anası ictimai qınaqdan qorxaraq qızından üz çevirir. Körpə Dorli dünyaya gəldikdən sonra qəyyumluq Monikanın bacısı Helqa ilə əri Volfqanqa keçir və onlar uşağı öz qızları kimi böyütməyə başlayırlar.

Monika musiqiçi Freddi ilə birlikdə səhnəyə çıxaraq rok-n-roll aləmində yolunu açır və eyni zamanda qızını geri almaq arzusu ilə yaşayır. Bu ərəfədə xaricdən xoşbəxt görünən digər bacılar — Helqa və Eva da ailə həyatlarındakı problemlərlə mübarizə aparırlar. Şəhərə Monikanın köhnə sevgilisi Yoaxim Frankın qayıtması isə hadisələrin gedişatına yeni çalarlar qatır.

Almaniya istehsalı olan «Ku'damm 59» dram serialının rejissoru Sven Bozedir. 2018-ci ildə nümayiş olunan layihənin baş rollarında Sonya Gerhardt, Klaudiya Mixelsen, Mariya Erix və Emiliya Şüle çəkiliblər.