İkinci həyat

Yuliya və onun hamilə bacısı Katya inkasator maşınına edilən silahlı basqının təsadüfi şahidlərinə çevrilirlər. Cinayətkarlar bütün mühafizəçiləri qətlə yetirsələr də, qızları görmürlər, lakin atılan kor güllə Katyanı yaralayır və o, xəstəxanada həyatını itirir. Həkimlər körpəni xilas edə bilirlər və Yuliya bacısının qızını övladlığa götürür. Elə həmin gün basqınçılardan biri Fövqəladə Hallar Nazirliyinin kapitanı Andreyin ailəsinin həlak olduğu qəzaya səbəb olur, nəticədə kişi işini və həyat eşqini itirir.

Bir il sonra cinayətkar dəstənin axtarışda olan rəhbəri ələ keçirilir və onu tanıyan Yuliya məhkəmədə əsas şahid kimi çıxış etməli olur. Quldurlar qadını aradan qaldırmaq istəyərkən təsadüfən yaxınlıqda olan Andrey onu xilas edir. Həmin andan etibarən keçmiş xilasedici Yuliyanı və onun himayəsindəki körpəni qorumağa başlayır.

Rusiyanın «İkinci həyat» dram serialı 2015-ci ildə nümayiş olunub. Ekran əsərinin rejissoru Andrey Vereşaqindir, baş rollarda isə Yevgeniya Osipova, İvan Stebunov, Yelena Molçenko və Antonina Barabanova çəkiliblər.