Marimar

Gənc Marimar dəniz kənarındakı köhnə daxmada nənəsi və babası ilə yoxsulluq içində gün keçirir. Ailəsini dolandırmaq üçün yemək oğurlamaq məcburiyyətində qalan qız qonşu malikanəyə girərkən nəzarətçiyə yaxalanır. İnsafsız işçi Marimarı sıxışdıranda mülk sahibinin oğlu Serxio qızın harayına yetişir və onu xilas edərək təmiz qəlbinə yol tapır.

Marimar ona səmimi hisslər bəsləsə də, Serxio bu sevgidən ailəsinə qarşı qisas kimi istifadə edir və mirasını tələb etmək üçün bu yoxsul qızla evlənir. Serxionun ögey anası Anxelika bu nikahı qəbul etməyərək gənc gəlini oğurluqda suçlayıb zindana atdırır, ardınca isə onun komasını yandıraraq nənə və babasının ölümünə səbəb olur. Həbsdən çıxan və kimsəsiz qalan Marimar paytaxt Mexikoya gedərək böyük bir malikanədə qulluqçu işləməyə başlayır və həmin evin illərdir onu axtaran doğma varlı atasının mülkü olduğunu bilmir.

«Marimar» melodram serialı 1994-cü ildə Meksikada istehsal olunub. Ekran əsərinin rejissoru Beatris Şeridandır. Əsas rolları Taliya, Eduardo Kapetilyo, Şantal Andere və Alfonso Iturralde canlandırıb.