Bu, Parisdir!

Koronavirus pandemiyasından sonra keçmiş şöhrətini itirən «Bütün Paris» kabaresinin sahibi Qaspar Bertil məkanı supermarketlər şəbəkəsinə satmaq ərəfəsindədir. O, həyat yoldaşı ilə birlikdə kəndə köçərək sakit bir həyat qurmağı planlaşdırır. Lakin bir vaxtlar bu ocağa rəhbərlik etmiş atasının xatirəsinə və ailə ənənələrinə hörmət Qasparı fikrindən daşındırır. Nəticədə o, satışı dayandırır və biznesi xilas etmək üçün yeni sərmayədarlar cəlb edir.

Müəssisəni dirçəltmək cəhdi Qasparın ailə münasibətlərində gözlənilməz qarışıqlıqlar yaradır. ABŞ-da rəqqasəlik karyerası naminə vaxtilə ailəsini tərk etmiş doğma anası ilə onu öz övladı kimi böyüdən ögey anası meydana çıxır. Hər iki qadın həm kabarenin idarəçiliyinə qarışmağa, həm də kişinin şəxsi həyatında söz sahibi olmağa çalışır.

Fransa istehsalı olan «Bu, Parisdir!» komediya-dram serialı 2024-cü ildə təqdim edilib. Ekran işinin rejissoru Mark Fitussi, baş rolların ifaçıları isə Aleks Luts, Şarlott de Türkeym, Ann Mariven və Sin Vandır.