Nazirlik

Qrişko və Brand əyalət şəhərinin tikinti kompleksi nazirliyində nazir müavini vəzifəsində çalışan iki köhnə dostdur. Hər gün müxtəlif problemləri həll etmək onların üzərinə düşür: gah səlahiyyətli nümayəndəlikdən nazirin işdən çıxarılacağı barədə xəbər gəlir, gah jurnalistlər gizli məlumatları yayır, gah da aldadılmış payçı qapı qarşısında etiraz edir. Hər iki məmur məsələni yoluna qoymaq üçün kimə nə qədər pul verməyi, kimi danlamağı və ya qorxutmağı yaxşı bacarır.

İşdən kənarda da qəhrəmanların qayğıları az deyil. Qrişkonun qanuni həyat yoldaşı, gənc məşuqəsi və yelbeyin qıza aşiq olan tələbə oğlu var. Brand isə şıltaq anası və çətin xasiyyətli sevgilisi ilə yola getməyə çalışır. Həyatları daim risk altında olan bu iki dost xidməti intriqaların və ailə qayğılarının öhdəsindən gəlməyə məcburdur.

«Nazirlik» adlı Rusiya dram serialı 2017-ci ildə çəkilib. Ekran əsərinin quruluşçu rejissoru Qriqoriy Fedorovdur. Əsas rolları İvan Oqanesyan, Kirill Safonov, Anna Polupanova və Sergey Koltakov canlandırıblar.