Sevgisizlik

Tamara təcavüz nəticəsində dünyaya gələn böyük qızı Dinkanı heç vaxt qəbul etməyib və ona soyuq yanaşıb. Həyatına oğlu Saşanı tək böyüdən dul Pyotr daxil olduqdan sonra qadının münasibəti bir müddət düzəlir. Lakin bu ailə səadəti tezliklə faciə ilə bitir: baş verən yanğında Pyotr həyatını itirir. Hadisəyə beşyaşlı Dinkanın kibritlə oynamasının səbəb olduğu iddia edilsə də, sübut tapılmır, amma ananın qızına nifrəti daha da alovlanır.

İllər keçdikcə Tamaranın övladlarına münasibəti kəskinləşir. O, kiçik qızı Lyusyanı və getdikcə atasına bənzəyən ögey oğlu Saşanı böyük sevgiylə böyütsə də, Dinkanı görməyə belə dözmür. Bir müddət sonra Saşa ilə Dinka arasında romantik hisslər yaranır. Bunu öyrənən Tamara qısqanclığa qapılaraq gəncləri ayırmaq üçün əlindən gələni etməyə başlayır.

«Sevgisizlik» adlı Rusiya dram serialı 2015-ci ildə ekranlara çıxıb. Ekran əsərinin quruluşçu rejissoru Yana Romanenkodur. Əsas obrazları Anton Makarski, İrina İvanova, Maksim Sarpov və Anastasiya Kuimova canlandırıb.