Mənim ikinci anam

Modelyer Daniela həyat yoldaşı Albertonun gizli ailəsi olduğunu və cinayət törətdiyini öyrəndikdən sonra ondan ayrılır. Ərini həbsxanaya göndərən qadın dincəlmək üçün rəfiqəsi ilə birgə dəniz səyahətinə yollanır. Kruiz zamanı o, həyat yoldaşını yenicə itirmiş və azyaşlı qızı Monika ilə tək qalmış iş adamı Xuan Antonio ilə tanış olur. Onların arasında qarşılıqlı hisslər yaransa da, birgə gələcək qurmaq asan başa gəlmir.

Xuan Antonionun şöhrətpərəst məşuqəsi İrene hər vəchlə onunla evlənməyə can atır və bu sevgiyə mane olmağa çalışır. Eyni zamanda səkkizyaşlı Monika da Danielanı qəbul etmək istəmir və onun anasının yerini tutmasına qarşı çıxır. Daniela səbirlə qızın etibarını qazanmağı bacarır, lakin illər sonra cəzasını başa vuran Alberto azadlığa çıxır. Qisas arzusunda olan keçmiş ər İrene ilə birləşərək artıq gənc qıza çevrilmiş Monikanı aldatmağı planlaşdırır.

«Mənim ikinci anam» (Mi segunda madre) teleserialı 1989-cu ildə Meksikada istehsal olunub. Layihənin rejissoru Migel Korseqadır. Melodram janrında olan ekran əsərində baş rolları Mariya Sorte, Enrike Novi, Berenise Dominqes və Liliana Abud canlandırıb.