Belgravia

Hadisələr XIX əsr Böyük Britaniyasında cərəyan edir. Ordu təchizatçısı Ceyms Trençard xeyli var-dövlət toplayaraq Londonun ən kübar məhəllələrindən sayılan Belqraviyada mülk alır. Lakin bu yeni həyat 25 il əvvəl baş vermiş kədərli ailə xatirələrini yenidən oyadır. O vaxtlar Ceymsin gənc qızı Sofiya zəngin əsilzadə ailəsinin varisi olan Edmund Bellasisə aşiq olmuşdu.

Gənclərin sevgisi faciə ilə nəticələnir: Edmund Vaterloo döyüşündə həlak olur, Sofiya isə dünyaya övlad gətirərkən vəfat edir. Uşağın nikahdankənar doğulduğunu düşünən və cəmiyyət içində rüsvay olmaqdan çəkinən valideynləri körpəni gizlicə başqa ailəyə övladlığa verirlər.

«Belgravia» serialı rejissor Con Aleksandr tərəfindən lentə alınıb. Böyük Britaniya və ABŞ istehsalı olan bu dram layihəsi 2020-ci ildə işıq üzü görüb. Ekran əsərinin baş rollarını Filip Qlenister, Təmsin Qreq, Harriyet Uolter və Saskiya Rivz canlandırıb.