Qızımın anası

Olya və Daşa uşaqlıqdan bəri bir-birinə arxa duran yaxın rəfiqələrdir, onların həyat yoldaşları isə təmizlik xidməti üzrə ortaq ailə biznesi qurublar. Hər iki qadının eyni vaxtda hamilə qalması xəbəri ailələri sevindirir. Lakin Daşanın körpəsi dünyaya gəldikdən az sonra vəfat edir və bu hadisə hər şeyi alt-üst edir.

Kədərə dözə bilməyən əri tibb bacısından həqiqəti öyrənmək istəyərkən ona xəsarət yetirir və dəmir barmaqlıqlar arxasına düşür. Həbsdən çıxdıqdan sonra cütlük ayrılmaq qərarına gəlir. Həm ərini, həm də işini itirən Daşa rəfiqəsinin yanına sığınır və onun beşyaşlı qızına dayəlik etməyə başlayır. Bir müddət sonra qəribə təsadüflər Daşanı keçmişlə bağlı şübhəli nəticələrə doğru aparır.

Ukrayna istehsalı olan «Qızımın anası» («Мама моей дочери») dram serialı 2019-cu ildə işıq üzü görüb. Ekran əsərinin quruluşçu rejissoru Yeva Strelnikovadır. Əsas obrazları Yevgeniya Rozanova, Yekaterina Varçenko, Valeri Pankov və Vladimir Zayets canlandırıblar.