Vətənsiz

Dörd fərqli insanın yolu Avstraliyadakı qaçqın saxlama mərkəzində kəsişir. Doğmalarının təzyiqindən təngə gələn təyyarə bələdçisi Sofi əvvəlcə şübhəli bir təriqətə düşür, ardınca isə özünü alman kimi qələmə verərək bu mərkəzə gəlib çıxır. Müharibə dəhşətindən qaçan əfqan Əmir isə səyahət zamanı ayrı düşdüyü ailəsini tapmaq ümidi ilə sənədləşmə qərarını gözləyir.

Müəssisənin digər tərəfində isə dövlət işçiləri dayanır. Ailəsini dolandırmaq üçün bura mühafizəçi düzələn Kəm tezliklə həmkarlarının qaçqınlara qarşı qərəzli münasibəti ilə üzləşir. Vəzifəsində irəliləmək istəyən məmur Kler isə mətbuatda böyüyən qalmaqalı ört-basdır etmək və böhranı idarə etmək üçün mərkəzə ezam olunur.

2020-ci ildə nümayiş olunan «Stateless» Avstraliya istehsalı dram serialıdır. Layihənin rejissorluğunu Emma Friman və Coslin Murhaus həyata keçirib. Baş rollarda İvonn Strahovski, Cay Kortni, Aşer Keddi və Fayssal Bazzi çəkilib.