Rossella

Hadisələri XIX əsrin sonu və XX əsrin əvvəllərində Genuyada cərəyan edən «Rossella» serialı zadəgan ailəsindən olan gənc qızın taleyindən bəhs edir. Rossella Andrei azad ruhlu və ətrafındakı dünyaya maraq duyan bir xarakterə malikdir. O, maşınqayırma zavodunun sahibi olan atası Pietro və bacısı Paolina ilə birlikdə yaşayır. Qızların anası Olimpiya isə hələ uşaqlıq illərində müəmmalı şəkildə dünyasını dəyişib.

Rossella yoxsul, lakin ehtiraslı və iddialı jurnalist Culiano Sallustioya aşiq olur. Nüfuzlu alman sənayeçilərinin varisi onunla evlənmək istədikdə, qız bu təklifi rədd edir və öz azadlığını seçir. Atası ilə münasibətlərini qıraraq sevdiyi kişi ilə qaçmağa qərar verir. Lakin Rossellanın həddindən artıq saflığı və sevgisi Culianonun əsl xarakterini anlamağa mane ola bilər.

İki mövsümdən ibarət olan İtaliya istehsalı melodramın rejissor kürsüsündə Canni Lepre və Karmine Elia əyləşib. Baş rolu Qabriella Pession canlandırıb, heyətdə isə Tereza Saponancelo, Anna Melato və Danilo Brucia yer alıb.