Vəhşi təbiət

Kitabxanada çalışan Elis Uayt psixiatr Lüter Adamsın qəbuluna gedir və keçmişini hamıdan gizlədir. O bildirir ki, cəmi on üç yaşı olarkən ona təcavüz etmək istəyən on səkkiz yaşlı gənci öldürüb. Həmin vaxt polis cəsəddəki xəsarətləri vəhşi heyvanların hücumu kimi qələmə verib, bu səbəbdən həkim qızın sözlərinə inanmaqda çətinlik çəkir.

Lüter pasiyentinin psixoloji vəziyyətini dərindən araşdırmaq üçün onu hipnoz seanslarına cəlb edir. Öz çevrilmələrini nəzarətdə saxlamaq istəyən Elis isə sərbəst şəkildə özünühipnoz üsullarını öyrənməyə çalışır. Tezliklə qadın Den adlı bir şəxslə tanış olur və illərdir daşıdığı qorxunc sirrini məhz ona danışmaq qərarına gəlir.

Böyük Britaniya istehsalı olan «Wilderness» serialı dram və dəhşət elementlərini özündə birləşdirir. 1996-cı ildə işıq üzü görmüş layihənin rejissoru Ben Boltdur. Baş rolları Maykl Kiçen, Cemma Cons, Rupert Vansittart və Ouen Til canlandırıblar.