İnsomniya

Psixoterapevt və hipnoz mütəxəssisi Yuri Ştal bütün hadisələrə sırf rasional yanaşan materialistdir. Lakin o, özünü əldən salan yuxusuzluğun səbəbini heç cür izah edə bilmir. Gecələr Yurini illər öncə həyatını itirmiş keçmiş həyat yoldaşı və mənasını anlaya bilmədiyi sirli işarələrlə dolu qarabasmalar müşayiət edir.

Yuxusuz gecələri striptiz-klubda keçirən həkim orada Anya adlı rəqqasə ilə tanış olur. Qızın boynundakı sonsuzluq simvolu formasında olan döymə Yurinin yuxularında gördüyü işarə ilə eynilik təşkil edir. Anya ilə aralarında qəribə bir bağ hiss edən həkim qısa müddət sonra yeni hipnaterapiya üsulu kəşf edir. Pasiyentlərin sürətli sağalması sübut edir ki, trans vəziyyətində insan indiki həyatının hüdudlarından kənara baxa bilir və bütün sirlərin açarı məhz oradadır.

«İnsomniya» triller və dram janrında çəkilmiş 2021-ci il Rusiya serialıdır. Layihənin rejissoru Olqa Frenkeldir. Baş rolu Qoşa Kutsenko canlandırıb, digər rollarda isə İrina Starşenbaum, Mariya Mironova və Aleksandr Robak çəkiliblər.