Doktor Preobrajenski

1960-cı illərin ortalarında istedadlı cərrah Lev Preobrajenski ölkədə ilk Gözəllik İnstitutunu yaratmağı qarşısına məqsəd qoyur. O, sovet plastik cərrahiyyəsini inkişaf etdirmək və bu sahədə Qərbdən geri qalmamaq niyyətindədir. Həmin vaxt onun gənc həmkarı İqor Zorin isə tamam fərqli bir arzu ilə yaşayır: o, peşəsini yüksək qonorar qarşılığında icra edə biləcəyi xarici ölkəyə getmək istəyir.

Preobrajenski məqsədinə çatmaq üçün DTK ilə razılaşmaya gedir. Təşkilat ona xüsusi şərtlə təcrübi şöbə açmağa icazə verir: burada yalnız xüsusi xidmət orqanlarının bildiyi məxfi əməliyyatlar aparılmalıdır. Zorin isə fikir ayrılıqlarına baxmayaraq, xaricə qaçmaq planını reallaşdırmaq ümidi ilə bu şöbədə işləməyə razılaşır. Tezliklə hər iki həkimi çətin qərarlar gözləyir.

Rusiyanın «Doktor Preobrajenski» dram serialı 2018-ci ildə ekranlara çıxıb və 3 mövsümdən ibarətdir. Ekran əsərinin rejissorları Sergey Taramayev və Lyubov Lvovadır. Əsas rolları Denis Şvedov, Pyotr Skvortsov, Aqniya Ditkovskite və Yuliya Auq canlandırıblar.