Ezo Gəlin

Erkən yaşda valideynlərini itirən Ezo qohumlarının yanında böyüyür və uşaqlıqdan ağır zəhmətlə qarşılaşır. Çətinliklərə baxmayaraq, o, həyat eşqi ilə dolu, cəsarətli və gözəl bir qız olur. Kəndin ən yaraşıqlı gənci Ömər onun sevgisini qazanır və cütlük evlənməyə qərar verir. Ezonu gizlicə sevən torpaq sahibi Bilal bu izdivaca mane olmağa çalışsa da, sevgililər ailə quraraq xoşbəxt günlər yaşayırlar.

Lakin Ömərin düşdüyü ağır yol qəzası hər şeyi alt-üst edir və hər kəs onun öldüyünü düşünür. Yalnız Ezo ərinin ölümünə inanmır və qəlbinin dərinliyində onun qayıdışını gözləməyə davam edir. Zaman keçdikcə ümidlər azalsa da, gənc qadın daxilinə qapanıb tənhalığı seçir. Yaşadığı bütün kədərli sınaqlara qarşı ona yalnız Ömərə olan sevgisi güc verir.

Türkiyə istehsalı olan «Ezo Gəlin» (Ezo Gelin) dram serialı iki mövsümdən ibarətdir və ilk dəfə 2006-cı ildə nümayiş etdirilib. Layihənin rejissorluğunu Uluç Bayraktar və Onur Tan həyata keçirib. Əsas obrazları Nurgül Yeşilçay, Erkan Sever, Hüseyin Akşen və Halil Kumova canlandırıb.