Şirin düşmən

Avropadan yenicə qayıdan Viktoriya Anduesa atasının qəfil ölümünün şahidi olur. Turizm şirkətinin rəhbəri olan atasını milyonlarla vəsaiti mənimsəməkdə ittiham edən işçi Xulio Sezar Qerrero bu qalmaqalı ictimaiyyətə açıqlamış və nəticədə şirkət rəhbəri infarktdan dünyasını dəyişmişdir. Həqiqətdən xəbərsiz olan Viktoriya atasının tamamilə günahsız olduğuna inanır. O, atasının ölümünə səbəb hesab etdiyi Xulio Sezardan qisas almağa qəti qərar verir.

Saxta sənədlərlə başqa bir kimliyə bürünən gənc qadın Xulio Sezarın etibarını qazanaraq onun həyatını məhv etməyi planlaşdırır. O, qarşı tərəfi qısa müddətdə özünə bağlayır və toya hazırlaşır, lakin içindəki nifrət hissi idarəolunmaz bir sevgiyə çevrilir. Həqiqəti öyrənən Xulio Sezar isə atasının əsl cinayətlərini Viktoriyanın üzünə vurur. Aldadıldığını anlayan kişi rəhmsiz bir intiqam yoluna qədəm qoyur və hisslər yerini barışmaz düşmənçiliyə verir.

Venesuela istehsalı olan «Şirin düşmən» melodram serialı 1995-ci ildə işıq üzü görüb. Serialın rejissor kürsüsündə Rafael Qomes və Luis Qaitan əyləşib. Baş rolları Nataliya Streyqnard, Xorxe Aravena, Raul Amundaray və Eliseo Perera canlandırıb.