Hər dəqiqə önəmlidir

1985-ci ildə Mexiko şəhəri dağıdıcı təbii fəlakətlə üz-üzə qalır. Baş verən güclü zəlzələ minlərlə insanın həyatına son qoyur və şəhəri xarabalığa çevirir. Yaşayış binalarının uçduğu bu ağır vəziyyətdə sağ qalanlar çıxılmaz vəziyyətə düşür.

Belə bir böhran anında bir neçə nəfər öz təhlükəsizliyini unudaraq fəaliyyətə keçmək qərarına gəlir. Həyatlarını riskə atan bu insanlar dağıntılar altındakı yaralıları xilas etmək üçün var gücləri ilə çalışırlar. «Cada minuto cuenta» serialı zamanla yarışan bu insanların fədakar addımlarını diqqət mərkəzində saxlayır.

2024-cü ildə yayımlanan Meksika istehsalı dram serialının rejissorları Fernando Urdapilyeta və Xorxe Mişel Qraudur. Əsas rollarda Xesus Savala, Azaliya Ortiz, Antonio de la Veqa və Osvaldo Benavides çəkiliblər.