Doğma qan

On yeddi yaşlı Veronika hamilə olduğunu öyrənəndə sevgilisi qorxub onu tək qoyur. Doğuş çox ağır keçir və körpə vaxtından əvvəl dünyaya gəlir. Anasının təkidinə və məsləhətinə qulaq asan gənc qız, uşağın imkanlı bir ailədə daha xoşbəxt böyüyəcəyinə inanaraq ondan imtina etməyə məcbur qalır.

Aradan illər keçir və iyirmi doqquz yaşına çatan Veronika gözlənilməz xəbər alır: sən demə, övladını uşaq evinə veriblər. O, dərhal doğma oğlunu axtarıb tapır və onu rəsmi şəkildə övladlığa götürür. Lakin qadın həqiqi anası olduğunu oğlundan gizlətməyi qərara alır.

2018-ci il istehsalı olan «Родная кровь» dram serialı Rusiya və Ukraynanın birgə layihəsidir. Ekran əsərinin rejissoru Roman Barabaşdır, əsas rolları isə Anastasiya Panina, Anton Batırev, Valeriya Xodos və Kseniya Nikolayeva canlandırıblar.