Tərcümədə məhəbbət

Çindən gələn Yan Tailandda şəxsi mağazasını açmaq niyyətindədir. Yerli qaydalara görə sahibkarlıqla məşğul olmaq üçün taylandlı ortaq tapmalıdır. Elə həmin vaxtlarda yerli gənc Pumcay çinli internet ulduzuna qarşı hisslər bəsləyir, lakin çin dilini bilməməsi onun bu qızla ünsiyyət qurmasına mane olur.

Təsadüfən yolları kəsişən gənclər hər iki tərəf üçün faydalı olacaq bir razılaşmaya gəlirlər. Pumcay mağazada rəsmi biznes tərəfdaşı olmağa və idarəetməyə kömək etməyə razılaşır, Yan isə bunun müqabilində ona çin dilini öyrətməyi öhdəsinə götürür. Gündəlik dil dərsləri və ortaq iş fərqli xarakterə malik bu iki gənci getdikcə bir-birinə yaxınlaşdırır.

Romantik komediya və dram janrında çəkilmiş «Love in Translation» serialı 2023-cü ildə Tailandda istehsal olunub. Ekran işinin rejissorluğunu Lit Phadung Samajarn və Toh Worawut Thanamatchaicharoen edib, baş rolları isə Daou Pittaya Saechua və Offroad Kantapon Jindataweephol canlandırıb.